 |
| Camiño de Inverno, etapa Pobra de Brollón-Monforte de Lemos |
Bota contas
Estamos a piques de comezar un ano novo, o 2021, que ten moito de especial porque é ano "xubilar".
No noso idioma esta palabra ten varias acepcións, pero as dúas mais comúns, moi relacionadas entre si, son: rematar o periodo de traballo profesional ao que dedicaches a túa vida, e ano dedicado ao descanso (no senso relixioso).
Pensando nunha ou noutra, as matemáticas andan detrás do xubileu, porque hai que contar o tempo ata chegar a ese descanso formal ou relixioso.
Segundo dí a Xacopedia, o sete e o cincuenta teñen a clave destes festexos. Por unha beira, cada sete anos chegaba o ano sabático, no que se daba descanso ás terras na honra divina, e cada cincuenta (remate de sete anos sabáticos, 7x7+1) era o "Ano Xubilar", que mais tarde pasou a chamarse "Ano Santo" e así é como o denomina a tradición popular.
Compre engadir as contas que nos levan ao título desta publicación:
- por qué o dous mil viente e un, MMXXI, é un ano xubilar se non é múltiplo de cincuenta, nin de sete?
- que é iso de Xacobeo 2021?
Xacobeo 2021
Antes de nada dicir que aplicamos a expresión "Ano Xacobeo" a un Ano Santo, que ocorre cando o día do apóstolo Santiago, o vinte e cinco de xullo (mes sete ...), é domingo (sétimo día ...).
Se non fose polos anos bisiestos, sería doado calcular cando é o Ano Santo, pero esta disparidade fai que non sexan cada sete anos, e por iso compre facerse a pregunta de cada canto ocorre este evento.
Non imos publicar aquí a resposta, porque vai ser unha tarefa de aula a facer á volta destas vacacións, pero si daremos algunha pista ...
- A primeira é que o anterior Ano Santo foi o 2010, bota contas.
- A segunda pódela atopar no portal brasileiro https://www.caminhodesantiago.com/ no que, ademais de moita información vinculada ás distintas rutas do Camiño, pódese descargar unha calculadora de Ano Santo feita cunha folla de cálculo.
- A terceira ten que ver co acontecemento que marca o arranque da festividade, a apertura da Porta Santa ou Porta do Perdón. Neste enlace podes ler cada canto tempo se abre, o que está a piques de ocorrer porque a conta atrás xa está iniciada.
E para os mais calculistas, o 2021 non é un número primo, pero é produto de dous primos; pescuda cales son.